Na  parroquia de Valongo, no concello pontevedrés de Cotobade, levan 37 anos celebrando a súa propia homenaxe á filloa, en tódalas súas vertentes. Cada ano fana coincidir coa festa na honra á Virxe do Libramento, polo que se transforma nunha cita moito máis que gastronómica.

A primeira fin de semana de setembro é unha data realmente importante para os veciños deste lugar, que participan activamente nestas celebracións, cada un poñendo o seu graíño de area para satisfacer aos demais veciños e aos visitantes.

No adro da igrexa reúnense centos de persoas para desfrutar do ritmo que marcan as orquestras, sempre acompañado das deliciosas filloas que elaboran os participantes do concurso.